31 C
Mossel Bay
29th Nov 2022
Community & LivingNature & Nurture

DIE TUINROETE SE BLOMME VAN HOOP

Heleen Coertze

Ons ry  vroeg Saterdag oggend, rigting  noord op die N2 vanuit ‘n  nat George met  die Tsitsikamma bos as eindbestemming. Dit is  presies  dieselfde pad wat ons  twee jaar gelede, net ná die verwoestende  veldbrande gery het om na die verskriklike  brandskade te gaan kyk.

Die N2, vanaf George na Tsistsikamma, is voorwaar een van die heel mooiste gedeeltes op die Tuinroete.  Groot, massiewe bome met lieflike name soos Kalanders, Suurbessie en Witstinkhout (Celtis Africana) omsoom op sekere gedeeltes die pad. Meng dan die heerlike soet geur van die Saliehout (Buddleja Salvifolia), spierwit Varkore of Wilde dagga wat verskillende tye van die jaar blom en jy het ‘n allesomvattende hemelse ervaring.

Met wisselende reёnpatrone wat eerder skaars as reёlmatig is, was die Suid-Kaap onlangs wѐl onder die gelukkige streke om heelwat goedheid uit die hemel te ontvang. Wanneer jy direk daarna hoor  dat daar massas pienk  en oranje  watsonias noú langs die teerpad naby die Stormsrivierbrug pronk, is daar nie veel verskonings oor as om dadelik in die pad te val nie.

Vanaf George draai die N2 see se kant toe. Die  magies-mistige-mooigeit buite resoneer voelbaar met die kinderlike  verwondering van die  insittendes binne in die voertuig.  Terwyl jy moeitevry en wetsgehoorsaam op 60 km per uur  deur Kaaimanskloof gly, verstaan jy eensklaps hoekom diѐ stukkie pad met sy baie diep klowe, een van die kopkrapper gedeeltes vir die padbouers tussen Kaapstad en Port Elizabeth in die middel van die 19 de eeu was. Die huidige pad kruis die Kaaimans-en Swartrivier met ‘n vrydraende betonbrug oor Kaaimansgat waar die gewilde  Kaaimans Restaurant sy besoekers met sushi en  pizzas lok en waar jy elke dag van 8-5 kan kyak.

Wildernis-dorp word omsoom deur die Wildernis Nasionale Park en vorm deel van die Tuinroete Nasionale Park   waar die beleid van ” bewaring sonder grense ” beoefen word. “Hierdie nuwe model plaas nogals ‘n groot onus en mede- verantwoordelikheid op die meer as 1 000 privaat eienaars wie se grond die Park en bewaarde area omsoom” laat my reismaat val.  

Voordat jy egter  te diep insak in die vraagstukke en slaggate van bewaringbeginsels, ry  jy verby Wildernis, Timberlake met sy eiesoortige  winkeltjies tot in Sedgefield met sy  Mosaiёkroete. Ons hou verby die bekende Sedgefield- boeremark wat elke Saterdag, regdeur die jaar, ‘n groot gunsteling  vir die plaaslike inwoners is. Vanoggend is geen uitsondering nie en dit lyk of  die hele Gauteng en Kaapstad ook hier kom uitspan. Die Ganzvlei melkplaas, net voor die Buffelsbaai afrit en die Goukammarivier, lê soos altyd pastoraal-groen reg langs die pad.

 Die Phantom Pas-afrit wink links en  herinner jou  om volgende keer die Sewepas roete van duskant af “terug”, deur die stilte van die woud,  Saasveld toe te ry.  Knysna is meregebied , maar vandag is daar geen optimistiese seilbootjies op  die water te sien nie.  Hoewel Knysna slegs 64 km ver vanaf George is, voel dit voorwaar of jy reeds ‘n paar ure van indrukke- inneem agter die oog het. Binne die  dorpie is die gewone Saterdagoggend miernes aan die skarrel. Ten spyte van die lawwe misreëntjie lok die oulike kunswinkeltjies, spesiale koffiewinkeltjies en bekende Thesen Eiland steeds optimistiese toeriste.

Tussen  Knysna en Plettenbergbaai sien jy kort-kort ou plantasies met nuwe denne  aanplantings. Die boompies staan regop en kordaat in gelid en jy hoor behoorlik hoe  hul wortels die klam grond inskiet.  Dis juis in diѐ strook pad waar die verwoestende veldbrande van 7-12 Junie 2017 groot gedeeltes verwoes het. Die alles-vernietigende vuur het veral naby Knysna formele en informele behuising verwoes ѐn sewe lewens geeïs. Die riller was nog nie verby nie – skaars ‘n jaar later, teen die einde van Oktober  2018 beleef die Tuinroete ‘n inferno wat glo 4 keer die grootte van die 2017 brande was. Volgens die Joint Operations Centre se verslag is  daar toe binne 10 dae meѐr as 86 000 hektaar deur veldbrande in die Tuinroete verwoes.

Vandag is daar heuphoogte massas pienk heide naby Bloukrans se Bungy Jumping stop en verder aan by Witteklip rek hul kophoogte toe. Jy is nou in Sarah Baartman se wêreld en Lottering en Elandsbos plantasies rits langs jou verby. By Daleen Matthee se bosstories en Big Tree  hou die kalanders wag oor die pad soos pligsgetroue soldate.

En dan sien jy dit…… spikkels van pienk, salm en oranje wat jou flambojant op hierdie klam Saterdagoggend inwag. In hul beste feesklere wieg en kopswaai die lelies van die veld asof in ‘n ramba.  ‘n Ongelooflike kleurespel vrolike watsonias, waai, jubel en dans op die maat van die stuitige somer reёntjie.

Jy hou  summier stil, trek van die pad af en omhels hierdie stukkie hemelse genade met oop arms. Jy verkyk jou aan die lang, smal blare wat ‘n waaier rondom die basis vorm en die salm en oranje kleure wat subtiel wissel in diepte en skakerings. Die verruklike skouspel van veelkleurige pypie-agtige blomme, afge-ets teen grys-swart verbrande stamme, is verstommend seerkry-mooi. “Watsonias is  daarvoor bekend dat hulle uitsonderlik blom wanneer goeie reёnneerslae na ‘n bosbrand volg ” laat my ingeligte reismaat gepas val.   “Tekens van konkrete Hoop”, herdoop jy summier die slanke bolplantjie met die wegryslag-. Wanneer jy dink dat daar ná ‘n brandverwoesting niks, maar niks ooit weer hier kan groei nie, dán juis ontplof hier ‘n  kleureskouspel direk nádat die hemelsluise sy  genade-deure oopgegooi het. Jy dink skielik  aan die papawer wat hoop simboliseer in Pablo Piccaso se ikoniese skildery Guernica en ry dankbaar en verwonderd  terug huis toe.

Related posts

NECTAR IN THE GARDEN

Christaan Viljoen

SUNBIRDS ON THE MOVE

Christaan Viljoen

Ageless Grace

Annlerie van Rooyen

Fragrance Fest blossoms

Nelma Ruschioni

A PATH WORTH FOLLOWING

Vivienne Fry

Local Coffee Roaster is Top Finalist

Laurinda Smit