Petrovna Metelerkamp, bekende skryfster en stigter van Hemel en See Boeke, het Groot Brak Leeskring op 13 Maart kom besoek. Sy het haar boek, “Ingrid Jonker – ‘n biografie” wat verlede jaar April in samewerking met Penguin Random House gepubliseer is, kom bekendstel. Petrovna het reeds twee biografiese boeke oor die lewe van Ingrid Jonker die lig laat sien en dié derde, omvangryke biografie, span voorwaar die kroon op jare se intense speurwerk en navorsing.
Ingrid Jonker, die begaafde jong digter wat op 19 Julie 1965 in die see by Drieankerbaai verdrink het, het gedurende die afgelope 50 jaar ikoniese status in die Suid-Afrikaanse letterkende verwerf. Sy het as’t ware wêreldwyd in die publieke oog gekom nadat oudpresident Nelson Mandela gedurende sy inhuldigingsrede in 1994 haar gedig ” Die Kind” voorgelees het: Heelwat van haar gedigte is sederdien getoonset en boeke oor haar lewe tot in Turks en Albanies vertaal!
Volgens Petrovna is die totale onopgesmuktheid in Jonker se gedigte, sonder enige slimmigheid en diep uit die hart, dít wat Metelerkamp so bekoor in die jong skryfster se werk. Metelerkamp bring in hierdie werk nuwe inligting wat sy neem uit onbekende briewe, dagboekinskrywings en onderhoude met mense wat Jonker geken het saam in die grootste werk tot nou toe oor een van Suid-Afrika se mees aangrypende kunstenaars.
Die Muses was weer eens teenwoordig dié mooi herfsoggend toe Petrovna Metelerkamp, skrywer, publiseerder, radio omroeper en joernalis wie se werke in tydskrifte soos Huisgenoot en Insig verskyn het, in die mooie Art@39Long Kunsgalery opgetree het.
