Die Tuinroete is een van die beste plekke in Suid-Afrika om vleilandvoëls waar te neem. Waarom is vleilandvoëls so interessant en wat is die verskil tussen vleilandvoëls en ander watervoëls? Vleilandvoëls is watervoëls en sekere soorte sangvoëls wat spesifiek aangepas is om in vleilande en moerasse te woon. Die vleilandhabitat is een van Suid-Afrika se mees bedreigde habitatte in Suid-Afrika, en sommige vleilandvoëls, soos die witvlerkvleikuiken en die grasuil, is ewe bedreig.
Vleilandvoëls is spesifiek aangepas om te leef in ’n habitat van digte riete, welige plantegroei met water of modder as ’n basis. Daarom het vleilandvoëls spesiale aanpassings wat hul in hierdie unieke habitat laat floreer. Die groter voëlspesies het gewoonlik lang tone wat hulle in staat stel om op drywende plantegroei te loop en op riete te balanseer soos die grootkoningriethaan, die grootwaterhoender en selfs ook die rooireier.
Nog ’n aanpassing is die gebruik van harde roepgeluide of fluite met lae frekwensies om hul teenwoordigheid aan te kondig. Dit is nie maklik om mooi kleurvolle vere te vertoon of om uitvoerige danse of vliegvertonings te gebruik in die vleilandhabitat nie. Daarom maak die meeste van die vleilandvoëls gebruik van harde roepe om hul regte tot hul gebied te verkondig.
’n Goeie voorbeeld is die rooiborsvleikuiken, een van die mees gesogte vleilandvoëls in die Tuinroete. Dié voël word eerder gehoor as gesien. Sy roep is ’n reeks laefrekwensie-fluitgeluide gevolg deur ’n harde, herhalende geroep: “oeie-oeie-oeie”. Dit is ’n kenmerkende roep wat ver dra en ’n uitstekende manier om sy teenwoordigheid bekend te maak in so ’n digte habitat. Die grootriethaan het net so ’n kenmerkende roep.
WAAR OM NA DIE VLEILANDVOËLS TE SOEK
Vleilandvoëls is gewoonlik skugter van nature en boonop ook goed gekamoefleer. As ’n mens egter geduldig is en bereid is om vroeg op te staan, sal jy tien teen een beloon word met ’n kans om van hierdie seldsame vleilandvoëls te sien. Daar is ongerepte vleilandhabitat rondom die vyf mere tussen Wildernis en Knysna. Hierdie vleilande is die tuiste van ’n groot verskeidenheid vleilandvoëls. Die beste plek om hulle waar te neem, is in die voëlskuilings by Langvlei en Rondevlei en by die voëlskuiling in die Tuinroete Botaniese Tuine in George wat ook toegang bied tot ’n vleiland met verskeie vleilandvoëls, insluitend the swartriethaan en die grootriethaan.
