Voëlkyk as Familie-aktiwiteit – Waar om te Begin

Dis vroegoggend. Die lug is stil, behalwe vir die sagte fluit van ‘n voël in die boom voor jou huis. Jy steek jou kop by die deur uit, koffie in die hand, en daar’s hy — ‘n rooiborsie wat jou dophou. En só begin dit: jou eerste stap in die wêreld
van voëlkykery.

Voëlkykery is vir almal. Jy hoef nie met ‘n duur teleskoop en ‘n sambreelhoed die bos in te stap nie. Al wat jy regtig nodig het, is tyd, skerp oë, en ‘n bietjie nuuskierigheid.

Waar begin jy as jy ‘n leek is — of dit as gesinsaktiwiteit
wil probeer?

Begin by die huis

Jy sal verstom wees hoeveel spesies jy in jou eie tuin of woonbuurt sal raaksien. Sit vir ‘n paar minute buite, bly stil, en kyk wat kom inloer.

Gebruik jou ore

Baie voëls verraai hulself nie deur beweging nie, maar deur sang. Begin leer hoe om ‘n visvanger se helder geroep van ‘n mossie se getjirp te onderskei.

Laai ‘n goeie app af

Die Roberts Bird Guide App is een van die beste vir Suid-Afrikaanse voëlkykers (beskikbaar in Afrikaans of Engels). Dit het foto’s, verspreidingskaarte, en klanke
om identifisering makliker te maak. Meer inligting beskikbaar by: www.sabirding.co.za

Maak dit ‘n speletjie met die kinders

Wie sien die meeste verskillende voëls? Wie hoor eerste ‘n fisant roep? Hou ‘n voëljoernaal met tekeninge of beskrywings — dis opvoedkundig én lekker.

Gaan stap

Plaaslike parke, wandelpaaie of selfs piekniekplekke is ideaal
vir beginners. Neem ‘n verkyker saam as jy een het, maar moenie dat dit jou terughou as dit nog op jou wenslys is nie.

Voëlkykery leer ons geduld, stil wees, en kyk met aandag. Dit bring mense nader aan mekaar — en aan die natuur. En soms, net soms, leer dit jou dat die mooiste liedjies nie van mense afkomstig is nie.