DEELTITELSKEMAS, REGSPERSONE EN HEFFINGS
Het jy geweet? Daar is meer as 56 000 geregistreerde deel-titelskemas in Suid-Afrika en hierdie getal is aan die toeneem. Eerste-keer huiskopers en jonger kopers het die afgelope paar jaar kleiner eiendomme en spesifiek eiendomme in deeltitelskemas verkies, aangesien dit nie net meer bekostigbaar is nie, maar ook omdat hulle veilige, toesluit-en-gaan-opsies bied.
Deeltitelskemas
Deeltitelskemas is gemeenskapskemas waar grond en geboue in afdelings verdeel word vir verkoop of verhuur. Die eienaars hou alleeneienaarskap oor hul deel binne die skema, terwyl hulle die gemeenskaplike eiendom gesamentlik besit.
Drie belangrike wetgewings reguleer deeltitelskemas, naamlik die Sectional Titles Act 95 of 1986 (STA), die Sectional Titles Schemes Management Act 8 of 2011 (STSMA), en die Community Schemes Ombud Service Act 9 of 2011 (CSOSA). Hierdie wetgewing reguleer die stigting, registrasie en eienaarskap van ‘n skema, wat spesifiseer wat die pligte en funksies van ‘n regspersoon is, en ook hoe die CSOS-ombud funksioneer.
Die Rol van die Regspersoon (Body Corporate)
Die kern van elke deeltitelskema lê by die regspersoon (body corporate), wat ‘n afsonderlike regsentiteit is. Elke eienaar in die skema word outomaties ‘n lid van die regspersoon. Die lede is verantwoordelik vir die verkiesing van trustees en ‘n voor-
sitter by die Algemene Jaarvergadering (AJV) wat moet optree namens die lede van die skema ten opsigte van die funksies en magte van die regspersoon. Dit sluit die bestuur van die gemeenskaplike eiendom en die stigting en instandhouding van ‘n administratiewe fonds en ‘n reserwefonds in. Hierdie fondse bestaan uit die heffings wat deur die eienaars in die skema betaal word en word aangewend om die bedryfskoste van die gemeenskaplike eiendom te dek.
Die Belangrikheid van Heffings
Heffings dien as die lewensbloed van die regspersoon en onderhou die integriteit en funksionaliteit van die skema. Die heffings wat deur die eienaars betaal word, dek ‘n wye verskeidenheid uitgawes, insluitend herstelwerk, instandhouding en versekering wat ten gunste van die skema uitgeneem is. Daarom is tydige en volledige betaling van heffings noodsaaklik om die integriteit en waarde van hul beleggings te beskerm. Hierdie kostes word tydens die AJV van die regspersoon bepaal en word dan proporsioneel tussen die eienaars verdeel.
Aanspreek van Nie-betaling van Heffings
In gevalle waar eienaars in gebreke bly met heffingbetalings, moet die regspersoon toepaslike maatreëls tref om die kwessie aan te spreek. Dit kan die aangaan van betalingsplanne behels, die soeke na oplossing deur die Gemeenskapskema-ombuds-
diens, of die gebruik van regshulp vir heffing-invorderings. Sulke aksies is van kardinale belang om die finansiële volhoubaarheid, behoorlike instandhouding en kontinuïteit van die skema te verseker.
Uiteindelik berus die effektiewe funksionering van ‘n skema op die kollektiewe verbintenis van sy eienaars om hul finansiële verpligtinge na te kom. Deur heffings stiptelik en ten volle te betaal, dra eienaars nie net by tot die instandhouding van hul gedeelde ruimtes nie, maar verseker ook die waarde van hul beleggings vir die toekoms.
