GB WALK 2023
Die derde GB Walk is moontlik gemaak deur die betrokkenheid van Cool Ideas, City & Suburbs Realty, Grootbrak Apteek en Aqua é Vida.
Tweebeen-deelnemers, vierbeenmaats en selfs driewiel-stootwaentjies, getooi in haassterte, tutu’s en haasore, het die strate van Groot-Brakrivier opgekikker tydens die stap. Dit was duidelik dat ouderdom geen perke plaas op kreatiwiteit en om die speelsheid van individue na vore te bring nie. Die kleurvolle veters, gestreepte of polkadotkouse, haasore wat soos antennas bo die ore rondwip en snorlyne om haasgesigte uit te beeld, is met groot oë agterna gestaar deur verbygaande verkeer.
’n Groep vrywilligers van myrun Groot Brak, onder leiding van Barend van der Merwe, het hand bygesit met die inskrywings en om deelnemers veilig langs die pad te begelei. Organiseerder Laurinda Smit het voor die stap die deelnemers bedank vir hul deelname en uitgewys dat sonder individue wat betrokke raak en opdaag by geleenthede soos die GB Walk dit nie moontlik sou wees om dit aan te bied nie. Na afloop van die GB Walk is daar ’n ruim donasie gemaak aan die Outreach-projek in Groot-Brak wat bestuur word deur Bets Nel en Anita Bolton.
